Why South Koreans No Fit Do Without Rice?

If you don ever watch K-drama or Korean movie, you go notice say rice na almost every meal. Morning, afternoon, night dem go still jam rice.

Even their snacks rice !. If person for movie no get rice and salt for house, e don finish be that e mean say the person dey suffer. But why Koreans love rice ? You sure say rice no dey their blood so?.

Rice No Be Just Food, Na Culture For Korea, rice no be just food wey dem chop to belleful o. E get history wey long pass Third Mainland Bridge.

Back in the day, the amount of rice wey you fit keep for house na wetin dem take know say you dey okay. The richer you be, the more rice you fit buy. E be like say rice be their own "owo" (money).

Na why for their movies, if person no get rice, dem don cast am say na suffering be that. Even their greetings dey show how rice take over their life.

Instead of "How you dey?" dem fit ask, "You don chop rice?" which mean say food na serious matter for dem.

If You No Chop Rice, You Never Chop.

The way we Naija people take love jollof rice or swallow pass anything, na so Koreans take hold their own rice strong. No matter how expensive food dey, rice must dey table. Na why for almost every scene for their movies, dem go just carry one small bowl of white rice, with small soup or kimchi join am. To dem, na balanced diet be that! E be like for Naija where if person no chop rice for party, e go talk say e never eat. You fit give am small chops, swallow, even small pepper soup, but once rice no show, wahala don dey. Na the same way Koreans dey reason am. Rice na their everyday food, and e don turn tradition wey dem no fit comot.

Even Their Snacks No Wan Leave Rice.

As if say the rice wey dem dey chop every day no do, even their snacks dey make from rice. You don hear of tteok (rice cake)? Na one kind chewy, sticky rice snack wey dem take celebrate different occasions. Even their popular street food tteokbokki na spicy rice cake wey dem dey cook inside pepper sauce. E be like say if Korea no get rice, e go be like Naija wey no get party jollof. Everybody go just dey restless.

Rice and Salt Na The Sign of Survival.

For inside Korean movies, you go notice say anytime dem wan show say person dey broke, dem go make sure say e no get rice and salt for house. For dem, if you never reach the level wey you no fit afford rice and salt, e mean say you never suffer reach.

E be like for Naija where if person dey broke, e go just dey chop garri without sugar or e go dey manage rice and oil without meat.

Rice and salt na wetin dem see as the minimum wey person suppose get to survive. So if e no dey, na confirmed hardship be that.

So, my people, no be say Koreans no sabi chop another thing o, but rice don dey their culture, history, and survival for centuries.

Na the way we dey take hold our own local food strong whether na rice, swallow, or beans na so dem dey see their own.

Next time wey you watch K-drama and you see dem dey chop rice again, just reason am say e be like when Naija person dey chop rice and stew with correct turkey.

Rice na life, no be only for Korea, but everywhere wey people sabi wetin good!